Neem hamare sharir ke liye bahut hi faydemand hoti hai, ye prakriti dwara di gayi ek prakritik jadi buti hai, jiske dwara aapke sharir ko kayi tarah ki bimariyo se dur rakha ja sakta hai aur sath hi aap ise soundarya ko badane mai bhi prayog kar sakte hai. Iss tarah iske anek labh hai. Toh yaha ham janege ki neem se hame kya fayde mil sakte hai.

Neem ki agar baat kare toh neem hamare sharir ke liye bahut hi faydem,and hota hai, yeh kay tarah ke rogo ke nidan mai toh prayog kiya hi jata hai, sath hi saoundarya prasadhano ka bhi ek mahatvapurna hissa hai. Neem ke ped ka har hissa jaise fal, chaal, patte aur tel aadi hamare liye labhdayak hota hai. Toh aaiye jante hai neem se hone wale har tarah ke faydo ke bare mai.

12 Fayde aur Upyog – Benefits of Neem Oil (Tel), Patte (Leaves) aur Chaal

benefits of neem

Twacha (Skin) Ko Sundar Banaye: Neem ki pattiyo ka sevan karne se ya phir neem ki pattiyo ka ras pine se hamara khoon saaf hota hai, jisse hamare chehre ki chamak badti hai. Iske alawa neem ke tel se sharir mai malish karne se hamari twacha rogo se dur rehti hai. Iske alawa sharir ki twacha ko bacteria aur anya infections se bachane ke liye ap chahe toh neem ki pattiyo ko pani mai ubaal kar, uske pani se naha sakte hai. Iss tarah isse hamari twacha sundar aur rog mukt rahegi.

Baalo (Hair) Ke Liye Faydemand: Neem ki pattiya hamare baalo ko swasth rakhne mai bahut madadgar sabit hoti hai. Agar aapke baalo mai rusi (Dandruff) ya phir koi anya infection hai toh aap neem ke pani ka istemal kar sakte hai. Iske alawa neem ke patto ka paste bana kar usme shehad mila kar paste bana le aur iss paste ko apne baalo mai lagaye. Isse aapke baalo mai rusi ki samasya khatam ho jayegi aur sath hi aapke baalo ki achchi conditioning ho jayegi.

Pet Ke Liye Faydemand: Pet se sambandhit anek samasyao se nijat pane mai neem bahut sahayak sabit hoti hai. Jin logo ko pet mai kabj ki samasya rehti hai un logo ka kabj dur karne ke liye neem ke fulo ko masal kar garam pani mai daal le aur uske baad chaan kar pani ko piye, isse aapki kabj ki samasya dur hogi. Iske alawa pet me keedo ko nasht karne ke liye bhi aap neem ka prayog kar sakte hai. Iske liye neem ke ras mai kali mirch aur shehad ko mila kar sevan kare. Isse aapko pet ke keedo se chutkara milega. Iske alawa dast (Loose motion) mai neem ki pattiyo ko sukha kar chini mila kar khane se aapke dast mai bhi araam milta hai.

Diabetes Mai Faydemand: Ahaar mai protein ki kami aur paryapt vyayam ki kami se vyakti ko diabetes hoti hai, iske alawa bahut adhik matra mai meethe padarth ka sevan karne se bhi vyakti diabetes jaisi ghatak bimari ka shikar ho jata hai. Neem iss rog ke liye ramban dawa hai. Subah ke samay neem ka juice lene se diabetes niyantran mai rehti hai aur sath hi agar neem ke tane ki chaal aur methi ke churna ka kadha bana kar kuch dino tak niyamit rup se sevan kiya jaye toh diabetes mai kafi labh mil sakta hai.

Patri Mai Labhdayak: Neem patri ki samasya se chutkara dilane mai bhi kafi madadgar sabit ho sakti hai. Iss tarah pathri ki samasya se bachne ke liye 150 gram neem ki pattiyo ko 1 liter pani mai pees kar ubaal le. Iss pani ke thande hone par iss pani ka sevan kare. Niyamit rup se iss tarah neem ke pani sa sevan karne se aapki pathri nikal sakti hai. Iske alawa agar aapki pathri kidney me hai toh rojana neem ke patto ki lagbhag 2 gram rakh pani ke sath le, isse aapko jarur labh mil sakta hai.

Fode Funsiyo Ko Thik Kare: Agar aapke sharir mai fode funsiyo ki samasya hai toh neem isme aapki kafi madad kar sakti hai. Iske liye aap chahe toh neem ke tel ka istemal apne sharir par lagane mai kar sakte hai, isse aapko fode funsiyo mai araam mil sakta hai, iske alawa agar aapke fode funsiyo mai ghav ban gaye hai toh uske liye neem ke patte, chaal aur fulo ko barabar matra mai lekar pis le aur iss bane huye paste ko apne sharir par lagaye. Isse aapke fode funsi aur usse huye ghav jaldi hi bhar jate hai.

Piliya (Jaundice) Mai Labhkari: Neem ka prayog piliya jaise rog ko dur karne mai bhi sahayak sabit ho sakta hai. Iss rog ke rehte rogi ko neem ke patto ke ras mai sonth ka churna mila kar sevan karna chahiye, isse piliya rog mai fayda mil sakta hai. Iske alawa sirf 2 bhag neem ki pattiyo ka ras aur ek bhag shehad mila kar pine se piliya rog mai kafi fayda mil sakta hai.

Jalne Aur Katne Par Madadgar: Neem mai antiseptic gun paya jate hai, jo ki jalne aur katne par kafi madadgar sabit ho sakti hai. Kabhi bhi agar aap jal jaye toh aise mai neem ke patto ko pis kar lagaye ya phir aap neem ka tel bhi istemal kar sakte hai. Iss tarah jale huye par neem lagane se aapko kafi araam milega. Iske alawa kat jane par aap neem ke tel ko laga sakte hai, aise mai neem ka tel lagane se titnis hone ka khatra kam ho jata hai.

Muhaso Ko Dur Kare: Neem aapke chehre ke muhaso ko dur karne me kafi madad kar sakta hai. Iske liye aap neem ke patto ko pani mai ubaal le aur iss pani ke thanda ho jane par iss pani se apne muh ko dhone me istemal kare. Isse aapke muhaso ki samasya dur ho sakti hai.

Hamare Daanto (Teeth) Ke Liye Faydemand Neem: Aapne suna hoga ki purane jamane mai log neem ki tehniyo se daanto ko saaf karte the. Isse unko daanto se sambandhit koi pareshani nahi hoti thi. Iss tarah agar aapko daanto se sambandhit koi pareshani hai toh aap bhi neem ki datun ko niyamit rup se kare, isse aapke daanto ke kitanu nasht hote hai aur sath hi masude majbut aur daant chamkile bante hai. Neem ki chaal aur patto ko mila kar pani mai mila kar ubaal le aur iss pani se kulla kare, isse aapke masudo se khoon aane ki samasya aur sath hi pariah ki samasya mai bhi labh mil sakta hai.

Kaan (Ears) Ke Rogo Ko Dur Kare: Kaan mai dard ya kaan ke behne ki samasya ko dur karne ke liye neem ke tel ka istemal kiya ja sakta hai. Iske liye neem ke tel ko bahut jyada garam kar le aur thoda thanda hone par ise apne kaano mai niyamit rup se dale. Aisa karne se kaan ke behrapan mai bhi araam mil sakta hai, sath hi ye kaan ke dard aur kaan ke behne mai bhi araam dila sakta hai.

You May Also Like -

Cholestrol ko Niyantrit Kare: Neem ki agar baat kare toh ye hamare khoon ko saaf karne ka kaam bahut achche se karti hai aur ise rakt-shodhak aushadhi ke naam se bhi jana jata hai. Toh ham keh sakte hai ki ye hamare cholesterol ko niyantrit karne mai madad karti hai. Agar koi bhi vyakti cholesterol ko kam karna chahe toh 200 gram neem ki pattiyo ke prayog dwara cholesterol ko kam kiya ja sakta hai.

Dil Ke Liye Faydemand: Neem hamare rakt ko saaf karti hai aur sath hi ye hamare dil ko swasth rakhne mai bhi kafi madadgar sabit ho sakti hai. Agar koi bhi vyakti mahine mai kam se kam 10 din neem ka sevan karta hai, toh isse heart attack ka khatra kafi hadd tak kam ho sakta hai. Iss tarah agar aap apne dil ko swasth rakhna chahte hai toh mahine mai kam se kam 10 din neem ka sevan kare.

Upar aapne jana ki neem ke aapko kitne sare fayde hai jinko shayad count karna bhi mushkil hai. Ye na sirf hamari twacha ke liye balki hamare pet, liver, kidney aur sharir ke har ang (Part) ke liye faydemand hai. Iske alawa kayi ghatak bimariyo se ladne mai hamari madad karti hai. Toh agar aap bhi isse milne wale faydo ka labh uthana chahte hai toh aaj se hi iska sevan karna aur prayog karna shuru kare.