Aaj kal ke samay me logon ko kayi aisi swasth pareshaniya hoti hai jo bahut aam hoti hain. Lekin kayi bar in samasyaon ke aam hote huye bhi ham bahut pareshan ho jate hain aur in aam samasyaon me se ek aam samasya hai sukhi khansi. Ye ek aisi samasya hai jo kabhi kabhi bahut takleef bhi dene lagti hai aur iske kaaran kayi baar hamare pet ki pasliyon me bhi dard hone lagta hai. Isliye iska upchaar karna bahut jaruri ho jata hai aur agar gharelu upaay dwara iska upchaar kiya jaye toh ye aur bhi achcha hota hai kyuki iske fayde toh hote hain lekin koi nuksan nahi pahuchta.

Waise sukhi khansi hone ke bhi kayi kaaran ho sakte hain, jaise smoking karna, asthma, lungs cancer, viral infection aur sardi jaise anya rog aadi. Lekin ham gharelu upchaar dwara iska nivaran kar sakte hain aur wo bhi bina kisi side effects ke. Toh aaiye jaante hain sukhi khansi ke upchaar ke liye gharelu upay.

10 Home Remedies for Dry Cough – Sikhi Khasni ka Desi Ilaj

Home Remedies for Dry Cough- Sukhi Khansi Ka Gharelu Ilaj

Garam Pani:
Sardi aur kisi bhi tarah ki khansi ke liye garam pani ka istemaal karna chahiye. Sabse pehle toh aapko pine me gungune pani ka istemaal karna chahiye aur sath hi gungune pani me namak ko dal kar us pani se garare (gargle) karna chahiye. Isse aapko jarur hi aap ki sukhi khasi me araam milega. Iske liye ek glass garam pani me ek chammach namak milakar subah aur sham dono samay garare (gargle) karen, isse aapko bahut hi jaldi araam milega.

Tulsi:
Tulsi sardi-khasi ke liye bahut hi faydemand prakritik utpaad hai. Iske sevan se sukhi khasi me bahut hi jyada araam milta hai. Iske liye tulsi ke patto ko pees kar uska ras nikaal le aur is ras me thoda sa adrak aur shehad mila kar rozana sone se pehle iska sevan karen. Isko khane se aapko aap ki sukhi khansi me jarur hi araam milega.

Haldi:
Haldi hamare shareer ke liye har tarah se labhdayak hai, phir chahe wo hamari sundarta badane ki baat ho ya phir hamare swasth ko thik karne ki baat ho. Sukhi khansi ko thik karne ke liye bhi ye bahut upyogi hai. Iske liye ½ cup pani ubaal le aur isme ek chota chammach haldi aur ek chota chammach pisi huyi kaali mirch daal le, iske baad is mishran ko phir se ubaal le. Is tarah bane huye mishran ka sevan karen aur tab tak Karen jab tak ki aapko aapki sukhi khansi me araam nahi mil jata. Iske alawa aap chahe toh raat ko sone se pehle ek glass garam doodh me aadha chammach haldi daal kar iska sevan kare, isse bhi aapko aapki khaani me araam milega.

Adrak (Ginger):
Adrak bhi aapki sukhi khasi ke liye bahut laabh dayak ho sakta hai. Iske liye adrak ko pani me ubaal le aur is pani me 2 chammach shehad mila le. Ab is pani ko din me 3 baar piyen, isse aap ki sukhi khansi dheere dheere thik ho jayegi.

Kaali mirch:
Pisi huyi kaali mirch ko ghee mein achchi tarah se bhun le aur is mishran ka sevan karen, aisa karne se aapke gale ko aur aapki khaasi me bahut araam milega.

Shehad (Honey):
Agar aap shehad ka sevan rozana karte hain toh isse aapko khansi me bahut araam milega. Shuddh shehad me kuch aise enzyme paye jate hain jinse khansi se rahat milti hai. Isliye din me 3 baar ek-ek chammach shehad ka sevan karen, isse aapko aapki khansi me araam milega.

Lehsun (Garlic):
Lehsun bhi hamare shareer ke liye bahut hi jyada labhdayak hota hai. Ye ek antibacterial hota hai jo gale ki khansi ko turant hi gayab karta hai. Iske liye ek cup pani me lehsun ki 2-3 kaliya ubaal le aur pani ke thanda ho jane par isme shehad milakar piyen, isse aapko jaldi hi araam milega.

Chay piyen:
Upar jitne prakritik utpaadon ke bare me humne bataya hai, unse hi milakar chay banaye. Iske liye aap tulsi, kaali mirch aur adrak ki chai banaye. Isse aapko khansi me bahut hi jyada araam milega.

Nimbu (Lemon):
Nimbu waise toh thanda hota hai lekin phir bhi ye aapki khansi ke liye laabh dayak ho sakta hai. 2 chammach nimbu ke ras me, 1 chammach shehad mila le. Ise din me 3-4 baar le. Isse aapke gale ko bhi araam milega aur sath hi aap ki khansi bhi thik hogi.

Pyaaj (Onion):
Aadha pyaaz ka ras nikaal le aur ek chota chammach shehad mila le aur is mishran ko din me 2 baar le. Isse aapko khansi me bahut araam milega aur aapke gale me bhi araam milega.

Upar apne jaana ki kis tarah gharelu upchaar dwara sukhi khansi ko thik kiya jaye. Toh agar aapko bhi sukhi khasi hai aur aap sukhi khansi se bahut pareshan hain toh in upayon ko apnay aur isse chutkara payen.