Garmiyo ke dino mai jaljeera ek pramukh aur prasiddh pey mana jata hai. Garmiyo ke dino mai aalas ko bhagane aur tarotaza mehsus karne ke liye log jal jeera ka sevan karte hai. Ye bahut hi swadisht aur aapko tarotaza mehsus karane ke liye ek behtar drink mana ja sakta hai.

Agar iske swad ki baat kare toh ye thoda chatpata aur khatte se swaad ka hota hai, yahi kaaran hai ki ye pine mai bada hi mazedar lagta hai. Market mai jaljeera ke bane huye packet bhi milte hai, jise aap pani mai ghol kar sevan kar sakte hai. Kayi baar toh log ise sukha hi kha lete hai, kyuki iska khatta aur chatpata swaad baccho se lekar bado tak ko bahut pasand aata hai.

Kayi baar log sirf pyas bujhane ke liye iska sevan karte hai, lekin yahi jal jeera apke pet aur muh ko bhi saaf rakhne ka kaam bhi karta hai. Iske alawa bhi iske kayi tarah ke swasth labh hai, jinke bare mai bahut se logo ko pata tak nahi hoga, toh aaj ham yaha jaljeera se hone wale faydo ke bare mai hi batane ja rahe hai. Ye aapke sharir ke khoon ko saaf karne ke sath-sath, aapke wajan ko kam karne mai bhi madadgar sabit ho sakta hai. Iske alawa bhi iske kayi swasth labh hai.

Iss tarah garmiyo ke dino mai jaljira ke sevan dwara aap apne sharir ko swasth rakh sakte hai. Toh aaiye jante hai ki garmiyo mai kis tarah Cumin Seeds faydemand ho sakta hai.

Jeera Water or JalJeera Se Hone Wale Fayade

JEERA WATER BENEFITIS

1) Pet (Stomach) ke liye faydemand: Jaljira ka sabse pehla aur sabse bada fayda ye hai ki ye hamare pet ke liye bahut jyada faydemand hota hai. Agar garmiyo ke dino mai ham jaljira ka sevan karte hai toh ye hamare pet ko thandak bhi deta hai aur sath hi pet mai kabj, gas aadi se rahat dilate hai. Iss tarah ye hamare pet ke pachan tantra ko thik rakhta hai.

2) Pani ki kami ko dur kare: Garmiyo mai hi jaljira ka sevan jyadatar kiya jata hai, iska sabse mukhya kaaran ye hai ki ye hamare sharir mai pani ki kami ki purti karne mai madad karta hai. Jaljira ka sevan karne se ye hamare sharir ko hydrate rakhta hai aur iss mai prayog kiya jane wala kaala namak hamare pet mai gas ko nahi banne deta hai.

3) Loo lagne se bachata hai: Garmiyo ke dino mai jaljira ka sevan karne se yeh aapke sharir ko loo lagne se bachata hai. Iske sevan se aapke sharir aur dimag ko thandak milti hai. Iss tarah garmiyo ke dino mai agar iska sevan kiya jaye toh ye hame loo se bachane mai sahayak sabit ho sakta hai.

4) Anemia ko dur kare: Vyakti ke sharir mai jab khoon ki kami hoti hai toh wo anemia ka shikar ho jata hai. Jaljeera mai istemaal kiya jane wale jeera mai kuch aise loh tatva paye jate hai jo ki hamare sharir mai khoon ki kami ko pura karne mai sahayak sabit ho sakte hai. Iss tarah agar aap niyamit rup se jaljira ka sevan karte hai toh isse sharir mai khoon ki kami nahi aati hai.

5) Masik dhram mai faydemand: Mahilao ko masik dharm ke samay mai jyadatar pet mai aithan, pet mai dard, ulti aur gas aadi ki samasya hoti hai. Jaljira mai adrak daal jata hai, jo ki masik dharm mai hone wali aithan aur dard mai araam dilane mai madad karta hai. Toh agar aap bhi iss pareshani se pareshan hoti hai toh jaljira ka sevan kare, isse aapko labh mil sakta hai.

6) Twacha ke liye faydemand: Jal Jeera aise padartho ka misran hai, jinme se kuch padartho mai bharpur matra mai vitamin-c paya jata hai aur yahi vitamin-c aapki twacha ke liye faydemand sabit ho sakta hai. Vitamin-C se twacha ka rang bhi nikharta hai aur sath hi isse aapko twacha sambandhi koi rog nahi hota hai. Iss tarah iske sevan aapki twacha ke liye achcha hota hai.

7) Wajan kam karne mai sahayak: Aaj ke samay mai jyadatar log apne sharir ke badte huye wajan se pareshan hai aur agar aap wajan ko kam karna chahate hai toh aap jaljira ke sevan dwara sharir ka wajan kam kar sakte hai. Garmiyo ke dino mai ham anya thande padartho ke isthan par jaljira ka sevan kar sakte hai, kyuki iske sevan se hamare sharir ko koi nuksaan nahi pahuchta aur wohi anya pey padartho ka sevan hamare sharir ke liye nuksaan dayak ho sakta hai. Iss mai kam calorie hoti hai aur sath hi ye aapke sharir se kharab padartho ko bahar nikalne mai madad karta hai. Iss tarah agar aap jaljira ka sevan karte hai toh isse aapko garmi se bhi rahat milegi aur sath hi ye aapke sharir ke motape ko bhi kam kar sakta hai.

Toh yaha aapne jana ki jaljeera aapke liye kis tarah se faydemand ho sakta hai. Toh ab garmiyo ke din aa gaye hai, ab aap bhi garmiyo ke dino mai apne sharir aur dimak ko jal jeera ke sevan se tahndak dilaye aur sharir ko swasth rakhe.