Aaj ki aadhunik jeevanshaily ke kaaran aisa koi bhi vyakti nahi hai jo tanav ka shikaar na bana ho. Aaj ke is samay me bade toh tanav ka shikaar bane hi hai sath hi bachcho ko bhi isne apna shikaar banaya hai. Iska sabse pramukh kaaran adhunik jeevanshaily hai, jisme vyakti ko khudke liye hi ek minute ka time nahi hai.

Logon ko khane ke liye hi time nahi rehta hai, jiska asar unki health par bhi padta hai. Tanaav ko kabhi bhi apne upar haavi nahi hone dena chahiye, kyuki tanav ke kaaran kayi prakaar ki bimariyan hame gher sakti hain. Kuch log tanav ko sehan kar lete hain lekin kuch log aise hote hain jo tanav ko nahi jhel pate hain. Tanav ka pura asar hamari life par padta hai.

Maan ki Shanti ke Upay in Hindi – Tension Free Life

Hamare jivan me kayi aisi paristithiyan (conditions) aati hai jab hum bahut pareshan rehte hain. Hamare jeevan me bahut sari pareshaniya aa jati hain jiske kaaran hum tanav ko mehsus karte hain. Kayi baar exams ke kaaran ya interview hone par, ya koi badi jimmedari hamare upar aane par ham ghabra jate hain aur tanav hum par havi ho jata hai. Lekin aisi condition me ghabrana nahi chahiye, apni life style me kuch chote chote badlav karna chahiye. In chote chote badlavo ke dwara aap aapke tanav se mukti pa sakte hain.

Jab vyakti tanav me hota hai toh wo har baat ko negative way me lene lagta hai, wo apni zindgi ke positive pehluon ko bhool jata hai aur uski zindgi tanav purna ho jati hai. Toh ab ghabrane ki koi baat nahi. Aaj hum aapko is article Tanav se bachne ke upaay me batayenge ki tanav ko kaise door kiya ja sakta hai, jisse aap tanav mukt jeevan ji sake aur apni zindgi khushi se ji saken.

Maan ki Shanti ke Upay in Hindi – Tanaav ki Pehchaan Kaise Karen?

Jab vyakti ke sir me dard bahut jyada rahe aur use lage ki use sir dard ki bimari ho gayi hai tab ye stress ke kaaran ho sakta hai. Vyakti me chidchidapan aana, bevajah gussa aana, bahut jyada thakaan hona, baalon ka bahut jyada jhadna, neend na aana, concentration me kami aana, ye sabhi stress ki hi pehchaan hai.

Agar kisi bhi vyakti me ye lakshan bahut jyada matra me dekhne ko milte hain toh hum keh sakte hai ki wo vyakti stress ka shikaar ho gaya hai aur aisi condition me agar koi vyakti hamare dwara bataye gaye upaayon par thoda dhyan dekar unhe apni jivan shaily me shamil kar le toh yaqinan hi use apne strees se kafi had tak araam mil sakta hai. Toh aaiye jante hain ki kis tarah aap apne strees ko kam kar sakte hain.

1) Chote Chote Break Le: Kaam karte samay aap chote chote break le, chahe aap kitne bhi busy kyun na ho aapko har ek ghante me 5 minute ka break lena chahiye. Aap bhale hi apna kaam bahut achche se karte ho lekin agar aap break nahi lenge toh aapka kaam achchi tarah se nahi ho payega aur aapka mann idhar udhar bhagega. Break isliye bhi jyada jaruri hai kyuki isse aap puri tarah refresh ho jate hai aur kaam me aapka mann achchi tarah lagta hai aur pure concentration ke sath aap kaam kar pate hain, kyuki aapki body ko relaxation bhi dena jaruri hota hai.

2) Yoga aur Dhyan Karen: Yoga ke dwara aap apne dimak ke tension ko kam kar sakte hain. Niyamit yoga karne wale vyakti ko kabhi bhi stress jaisi koi samasya nahi hoti hai. Jo vyakti niyamit yoga aur vyayaam karta hai wo bahut hi kam beemar hota hai. Isliye yoga ko apni dincharya me jaroor hi shamil karna chahiye.

Dhyan bhi bahut achcha maadhyam hai stress se mukti dilane ke liye, ise aap kahi bhi kar sakte hain. Bas thoda sa samay nikale aur man ko shaant karke, aankhen band karke chupchap baith jayen. Isse aapko bahut hi jaldi aaraam milega. Sath hi isse aapke dimak se negative vichaar bhi nikal jayenge aur aap tarotaaza mehsoos karenge.

3) Puri aur Paryapt Neend Le: Raat ko jab aap bahut der tak jaagte hain aur phir thaka hua mehsoos karte hain toh ye tanav ko bulava dena hi hota hai. Tanav mukt rehne ke liye aapko puri neend lena bahut hi jyada jaruri hai. Doctors ka manna hai ki jin logon ki neend puri nahi hoti hai unka metabolism thik nahi rehta hai, jiske kaaran un logon me thakaan aur tanav ki pareshani bani rehti hai. Tanav mukt rehne ke liye aapko rozana 6-8 ghante ki neend lena bahut hi jyada jaruri hai.

4) Lambi Saans Le: Jab bhi aapko bahut gussa aa raha ho ya achanak hi aapke samne koi pareshani aa gayi ho, jiska pura jor aapke dimaak par lag raha ho aur jo aapke tanav ka kaaran ban raha ho. Tab aisi condition me aap apne dimak ko shaant kar le aur gehri aur lambi saanse le. Isse aapka dimak bhi shaant ho jayega aur aap us kaam ko araam se stress free hokar kar payegne.
Samaanya roop se bhi jab aap tanav se gujar rahe ho tab aap aankhe band karke gehri aur lambi saanse le aur apna pura dhyan apni saanson par kendrit Karen isse aapko bahut shanti milegi aur aap stress free rahenge.

5) Jyada Coffee Pine se Bache: Coffee jitna ho sake kam hi piye kyuki coffee se shareer me adrenaline badta hai, jiske kaaran tanav me bhi vridhdi hoti hai. Coffee ke sevan ka khass dhyan sham ya raat ke samay rakhna chahiye kyuki sham ke samay coffee ke sevan se neend nahi aati hai, jis kaaran agar aapko neend nahi ayegi toh aap soyenge nahi aur aapki neend puri nahi hogi aur aapka stress badega.

6) Apni Pasand ka Music Sune: Sangeet stress ko door karne ka ek bahut hi achcha upaay hai, iske dwara aapka mann shant hoga aur aap utsaah se bhar jayenge. Sangeet sunne se aapke dimak me positive vichaar aate hain. Isliye jab bhi aapko koi stress ya tension jaisa feel ho tab aap music ka sahara le aur tension se mukt rahe.

Maan ki Shanti ke Upay in Hindi

7) Problems Share Karen: Agar aap bahut kathin paristithi (condition) se joojh rahe hain aur bahut jyada parehaniyon ke kaaran aap bahut tension me hain, tab aisi condition me ye jaruri hota hai ki aap apni pareshani ko apne kisi kareebi se share Karen. Jab hum apni pareshani kisi kareebi se share karte hain toh hamara dil halka ho jata hai aur hame us pareshani ke solution ke liye rasta bhi milta hai.

8) Paryapt Bhoajan aur Pani ka Sevan Karen: Jab paryapt bhojan karne ki baat aati hai toh aap achchi tarah ghar me bana hua bhojan hi khayen, kyuki ghar me bana hua bhojan atyant poshtik aur laabhdayak hota hai. Yeh na keval aapke swasth ke liye laabhdayak hoga balki ghar me paka hua bhojan aapko fit bhi rakhta hai. Lekin aaj ke samay me log bhookh lagne par bahar milne wale kisi bhi types ke snacks kha lete hain ya phir pizza aur burger se pet bhar lete hain. Ye aapke shareer ke liye nuksaan dayak hote hai, isliye jab achchi bhookh lage toh ghar ka paka hua bhojan hi pet bharkar khayen.
Bhojan ke baad baat aati hai pani ki. Pani hamare shreer ki ek bahut hi bahumulya jarurat hai. isliye samay se apna bhojan Karen aur time time par pani peete rahen. Isse aap stress free rahenge.

9) Jyada Tang (Tight) Kapde na Pehne: Jyada tang kapde na pehne, usse aapko chidchidapan bhi ho sakta hai. Daily wears ke hisab se aaram dayak kapde pehne, jisse aapko achcha aur araam dayak mehsoos hoga aur aap tanav mukt mehsoos karenge.

10) Khudke Liye Time Nikale: Khud ke liye samay jaroor nikale. Jo aapki pasandeeda jagah ho wahan jayen aur kuch samay wahan jakar bitayen. Agar aap akele wahan jaana pasand karte hain toh akele hi jayen aur agar aapko wahan apne doston ya family members ke sath jaana achcha lagta hai toh aap unke sath bhi ja sakte hain. Lekin jaise bhi ho apne liye time nikale kyuki aaj ke samay me vyakti ke pass har cheez ke liye time hota hai lekin wo khudke liye ek minute bhi nahi deta hai , jo ki bahut hi jayada jaruri hai. Isse ham khudko jante hain aur samjhte hai, isse hame ye pata lagta hai ki hum apni zindgi se kya chahte hai aur hame hamare sawalon ke jabaw khud ko janne se hi mil pate hain.

11) Sone se Pehle Bath Le: Jab aap ghar par thake huye aate hain toh sone se pehle nahana na bhoole, kyuki nahane se hamare shareer ki puri thakaan nikal jati hai aur hum bahut hi achcha mehsoos karte hain jisse hame neend bhi bahut achchi aati hai. Jo ki stress ko kam karne ke liye bahut hi jyada jaruri hai. Aap chahe toh thande pani se naha sakte hai ya aap garam pani ka bhi prayog kar sakte hain.

12) Sar ki Malish: Sar ki malish ke dwara bhi aap apne tanav ko kam kar sakte hain. Jab bhi aapke sar me dard ho tab aap apne sar ki malish karwa le, isse aapke sar ka blood circulation hoga aur aapko sar ke dard se bhi chutkaara mil jayega.

13) Shareer ko Stretch Karen: Jab bhi aap ko kaam karte karte jyada time ho jaye aur aap thaka hua aur tanav purna mehsoos Karen toh aap apne shareer ko stretch Karen. Aap yakeen nahi maenge isse aapko sach me bahut hi achcha mehsoos hoga. Body ko stretch karne se bahut hi aaram milta hai, aur aap bahut hi relax mehsoos karte hain.

14) Apne Kareebi Logon ke Saath Time Bitaye: Apne kareebi logon ke sath samay bitayen, isse aapko bahut hi jyada achcha feel hoga. Jab hum apne kareebi logon ke sath achcha samay bitate hain toh khudbakhud hi hamara dimak thik ho jata hai aur ham stress free ho jate hain.

Upar hamne aapko bataya ki jab bhi aap bahut hi jyada thaka hua mehsoos Karen aur aapka dimak bahut hi jyada tension me ho tab aap us tension ko kaise door bhaga sakte hain. Hamare is article Tanav se bachne ke upaay se aap apne tanav ko door kar sakte hain. Toh ab der kis baat ki hai, aaj se hi hamare dwara bataye gaye upaayon ka upyog Karen aur apne tanav ko kam karke achcha jeevan vyateet karen.