Barish ke mousam mai kis tarah kare twacha ki dekhbhal

Barish ka mousam sabhi ko bahut accha lagta hai aur jyadatar logo ko barish mai bhigna bhi bahut accha lagta hai. Lekin agar dekha jaye toh barish ke mousam mai hamari twacha bejan ho jati hai aur sath hi hamare baal bhi jhadne lagte hai. Aise mai agar ham barish ka luft uthana chahte hai toh hame hamari twacha ki khaas dekhbhal ki jarurat hoti hai.

Barish ke mousam mai twacha ki dekhbhal karne ke liye ham aapko kuch tips batane ja rahe hai, jisse barish mai bhi aapki twacha ki khubsurti kharab nahi hogi. Waise skin ko sundar banaye rakhne mai hamara khan-pan bhi bahut important hota hai, isliye har mousam mai apne khan-pan par hi vishesh dhyan dena chahiye.

6 Skin Care Tips for Rainy Season in Hindi

Skin Care In Rainy Seasonin in HINDI

Toh aaiye jante hai ki kis tarah barish ke mousam mai twacha ki khaas dekhbhal ki jaye.

Jyada se jyada pani piye: Barish ka mousam pani ka mousam jarur hota hai, lekin iss mousam mai bhi aapke sharir ko pani ki jarurat hoti hai. Isliye barish ke mousam mai bhi aapko kam se kam 8-10 glass pani jarur pina chaiye. Kyuki aap jitna adhik pani piyoge, aapki twacha utni hi sundar aur shiny banegi, iske alawa acchi matra mai pani ka sevan karne se twacha hydrate bhi rehti hai. Isliye agar aap chahte ho ki barish ke mousam mai bhi aapki twacha ka glow bana rahe toh aap pani ka jyada se jyada sevan kare.

Sahi khan-pan hai jaruri: Skin ko swasth aur sundar banaye rakhne mai hamara khan-pan bhi aham bhumika nibhata hai. Isliye hame sahi aur santulit ahaar ka sevan karna chahiye, isse barish ke mousam mai bhi twacha ko sundar banaye rakha ja sakta hai.
Toner ka kare prayog: Toner ka prayog jarur karna chahiye, kyuki toner ka prayog karne se yeh twacha ko saaf banaye rakhta hai aur sath hi twacha ke pores ko bhi band kar deta hai. Iske alawa iske prayog se twacha ka pH balance bhi thik rehta hai. Isliye rojana aap jab bhi muh dhone jaye toh usse pehle toner ka prayog kare.

Moisturizer ka prayog: Barish ke mousam mai moisturizer ka prayog tab bahut jaruri ho jata hai jab aapki twacha rukhi ho. Waise bhi agar dekha jaye toh barish ke mousam mai twacha rukhi ho hi jati hai aur aise mai agar aapki twacha rukhi hai toh aapko moisturizer ka jarur istemal karna chahiye. Iske liye din mai ek baar moisturizer jarur lagaye aur ho sake toh raat ko sone se pehle hi lagaye. Isse aapki rukhi twacha ko nami milegi.

Fruit facepack ka istemal kare: Agar barish ke mousam mai aap glowing skin pana chahte hai toh iske liye jaruri hai ki aap apne chehre par fruit face pack jarur lagaye. Iske liye aap peach, papaya, strawberry aur mango se bane facepack laga sakte hai. Ye aapki twacha ko barish ke mousam mai bhi bekar nahi hone degi aur aapki twacha sundar aur chamakdar bani rahegi.

Oily product ke istemal se bache: Barish ke mousam mai aap apni twacha par cream base foundation, concealer aur bahut jyada matra mai moisturizer ka prayog na kare, kyuki agar aap inn products ka istemal karti hai toh yeh barish mai dhul sakte hai aur sath hi pure chehre ko kharab bhi kar sakte hai. Agar aap chahe toh make up karne se pehle calamine lotion ka istemal kar sakti hai, isse aapki twacha par oil nahi aayega.

Heavy make up karne se bache: Barish ke mousam mai heavy make up karne se bache, kyuki iss mousam mai heavy make up suit bhi nahi karta aur sath hi pani lagne par aapka make up dhul bhi sakta hai, kyuki barish ke mousam mai kabhi bhi barish aa sakti hai. Iske alawa monsoon mai apni twacha ko saans lene dena chahiye, isliye barish mai thoda hi make up kare toh aapke liye behtar hoga.

Upar aapne jana kuch aisi tips ke bare mai jisse aap apni twacha ko barish ke mousam mai bhi sundar aur chamakdar banaye rakh sakte hai. Toh agar aap bhi yahi chahte hai ki aapki twacha par bhi barish ke mousam ka asar na pade toh aap bhi upar bataye gaye tips ko follow kare aur barish ke mousam ka khul kar maza uthaye.