Agar dekha jaye toh aaj ke samay mai har vyakti ko gardan mai dard, kandho mai dard, peeth mai dard, kulho mai dard, kohni mai dard, pairo ka dard, bajuo mai dard aadi sambandhit pareshaniya rehti hai hai. Jise slip disc ki bimari kaha jata hai, lekin ise ham kisi bhi tarah ki bimari nahi keh sakte, parantu haan ye ek tarah ki sharir ki takniki kharabi hoti hai. Agar dekha jaye toh bharat mai lagbhag 20 se 25 % log iss pareshani se jujh rahe hai. Toh aaiye aaj iss lekh mai ham slip disc ke bare mai puri tarah se jante hai.
Slip disc ki bimari mai disc slip nahi hoti hai, balki spinal cord se bahar aa jati hai. Darasal disc ka bahri hissa majbut membrane se bana hota hai aur uske beech mai taral jalinuma padarth bhara hota hai. Disc mai moujud jelly aur cushions jaisa bhag connective tissues ke circle se bahar nikal jata hai aur aage ki taraf bada hua hissa spinal cord par dabaw banata hai. Kayi baar umar badne ke sath sath ye taral padarth sukhne lagta hai aur achanak jhatke se ye membrane tutne lagti hai. Ise slip disc kaha jata hai.
Iss tarah ye choti si bimari aapko pareshan kar sakti hai, toh aaiye vistar se jante hai iss bimari ke hone ke kaaran aur upchar ke bare mai.

Slip disc hone ke kaaran

  • Ye bimari unn logo ko adhik hoti hai, jo pure din baith kar padayi, likhayi, silayi, bunayi aadi karte hai, jisse dono bujhao mai dard ho sakta hai.
  • Ya phir aisa koi kaam karte hai jisme kamar aur gardan jhuki rehti hai, iske alawa jo mahilaye bina araam kiye jhuk kar kaam karti hai aur apni kshamta se bhi jyada kaam karti hai, unn mahilao ko bhi ye bimari ho sakti hai.
  • Jo log bilkul bhi chalte phirte nahi hai aur na hi vyayam karte hai aur sara din kuch na kuch khate rehte hai, ye rog unn logo ko bhi ho sakta hai.
  • Sharir ka wajan badne se ya phir din-raat bahut jyada wajan uthane se reed ki haddi (Backbone) par jor padta hai, jise haddiya aur manspeshiya sehen nahi kar pati hai aur vyakti iss bemari ka shikar ho jata hai.
  • Galat tarike se tede-mede ho kar sona, bahut jyada araam dayak sofe par aur kursi par ghanto tak baithe rehna, high pillow ka istemal karna aadi iss rog ke kaaran ho sakte hai.
  • Kayi logo ki reed ki haddi mai janm se hi vikar hota hai, kisi accident ke time reed ki haddi par chot ya dabav padne ke kaaran dard shuru ho jata hai.
  • Jin logo ki haddiya kamjor pad jati hai ya phir jinhe gathiya ya asthi sandhi rog hota hai, unn logo ko bhi ye rog ho sakta hai.
  • Bhojan mai puri matra mai khanij, vitamin aur khas kar vitamin-D na lene ke kaaran bhi ye rog utpanna ho sakta hai.
  • Slip disc ke lakshano ko kaise pehchane ?

  • Gardan mai akdan aur dard hona, chakkar aana, chati mai dard hona.
    Kamar mai subah ke samay akdan ke sath dard hona.
  • Der tak khade hone par pairo ka sunna pad jana, jalan hona aur jhanjhanahat hona.
  • Kayi baar hamare ek pair ya dono pair ka, upar ya neeche bhag mai kuch bhaag sunna pad jata hai, ye iss bimari ka mukhya lakshan mana jata hai.
  • Spinal cord ko beech mai dabane par hip or thigh ke aas-pass sunna pad jana.
  • Slip disc ke upchar: Treatment aur Exercise

    SLIP DISC TREATMENT AND EXERCISE in Hindi
    Slip disc hone par jyadatar marijo ko doctor araam karne ki hi salah dete hai. Kam se kam 2 se 3 hafte tak araam karna chahiye aur doctor ke kahe anusar daawo ka sevan karna chahiye. Iske alawa agar davao ke sevan ke baad aapko kuch badlav mehsus ho toh doctor ko dikhaye. Bahut se mamle aise hote hai jinme surgery hi hoti hai, lekin surgery se pehle doctor se puri tarah paramarsh le kar hi ise karwaye. Iske alawa bhi iske kuch upay hai jinhe neeche bataya ja raha hai.

    Lifestyle mai kare badlav:
    Iss bimari se bachne ka sabse pehla upay ye hai ki aap apni life style mai badlav kare, jaise ki ulte ho kar na soye, agar aapka kaam baithe-baithe karne ka hai toh aisi chair par baithe jisme aapki kamar ko araam rahe, sharir ka wajan na badne de, rojana walk kare, jhatke se uthna-baithna na kare, Kamar jhuka kar kaam na kare, agar aapko lambi drive karna hai toh kamar aur gardan ke piche takiya laga le. Iske alawa jyada mote gadde par na soye aur na hi jyada mota takiya lagaye.

    Yogasana ko apnaye:
    Yogasana ke dwara har tarah ki pareshani dur ki ja sakti hai basharte aap ise sahi kare. Kyuki aise kayi tarah ke yogasana hai jo ki aapke sharir aur reed ki haddi ko araam pahuchane ka kam karte hai. Inhe aap asaani se ghar par hi kar sakte hai, ye kafi asardar sabit hote hai.

    Stretching kare:
    Stretching iss bimari ke liye ek bahut hi accha upaay hai, iske dwara aap stretching karke back pain mai araam pa sakte hai, sath hi ye bahut hi asaan hota hai. Isko karne se pehle bas ek baat ka dhyan rakhna jaruri hai ki aap isko karne se pehle kisi physiotherapist se jarur salah le le.

    Aerobics kare:
    Aerobics bhi slip disc ka ek accha ilaaj hai, iske dwara iss bimari mai labh paya ja sakta hai, bas ise karne se pehle doctor se jarur salah le.

    Light exercise kare:
    Koi bhi bimar vyakti kisi bhi tarah ki jor se ki jane wali aur higher energy lene wali exercise nahi kar sakta hai. Iss tarah agar aap chote-mote aur asani se kiye jane wale vyayam aur exercise kar sakte hai toh unhe kariye, isse aapko araam milega.

    Iss tarah upar apne jana slip disc namak bimari ke bare mai. Jisse aap iske bare mai acchi tarah jan kar iska ilaaj kara sakte hai aur iss bimari se bach sakte hai.