Hasya Yoga – Tanav ko Dur Bhagaye Laughter Yoga Se

HASYA yoga - Laughter Yoga in hindi

Hasya Yoga (Laughter yoga) ka naam sunkar hi aap samajh gaye hoge ki ye yoga hamari jor ki hasi se hi sambandhit hai. Ji haan kayi baar jab aap subah morning walk par jate honge toh aap park mai ya phir apne aas-pass ye dekhte honge ki bahut se log ek sath bahut jor-jor se hanste hai aur jab aap waha ja kar iss hasi ke kaaran ka pata karte hai toh aap dekhte hai ki ye thahake bina kisi kaaran ke hai lagaye ja rahe hai.

Iss tarah bina kisi kaaran ke jor-jor se thahake lagane ki prakriya ko hi hum laughter yoga ke naam se jante hai.

Aaj ke samay mai har vyakti tanav se gujar raha hai aur iss tanav ko dur karne ke liye laughter yoga ek bahut hi accha aur achook upay hai. Aise logo ki sankhya badti ja rahi hai jo apne tanav ko dur karne ke liye laughter yoga ka sahara le rahe hai.

Darasal ye yoga sach mai tanav ko kam karne mein saksham hai, yahi kaaran hai ki iss yoga ko karne wale logo ki sankhya dino din badti ja rahi hai. Aaj ham apne iss article mai aapko isko karne ki vidhi aur isse hone wale labh ke bare main batate hai.

Har saal may mahine ka pehla Sunday world laughter day ke rup mai manaya jata hai. Laughter therapy aur laughter yoga therapy dono hi hamare tanav ko kam karte hai, lekin dono ko karne ka tarika thoda sa alag hai.

Tho aaiye jaante hai laughter therapy aur laughter yoga therapy ko karne ki vidhi ke bare mai.

Hasya Yoga Kese Kare – Laughter yoga karne ki vidhi

Laughter yoga therapy, laughter therapy ka thoda viksit rup hai. Laughter therapy mai lagbhag 2 minute tak bina kisi kaaran ke ji khol kar hasa jata hai aur wohi laughter yoga therapy mai ek nishchit samay ke antral se ek samanya swas vyayam aur uttejit hasi lagayi jati hai. Iss tarah isme yog bhi aa jata hai aur therapy bhi.

Iss tarah jab koi bhi vyakti hasta hai toh isse uska pura tantrika tantra kayi tarah ke rasayan ko release karta hai aur sath hai isse dimag ke neuro chemicals sakriya ho jate hai, jisse pure sharir ko bahut accha lagta hai. Iss yoga therapy ki madad se koi bhi vyakti apne mood ko kuch hi minutes mai badal sakta hai. Iss tarah ye kisi bhi vyakti ke mood ko positive way mai le jane mai madad karta hai. Iss tarah iss yoga therapy ke kayi fayde hai, jinke baare mai aaiye neeche jante hai.

Hasya Yoga Benefits – Laughter Yoga Ke Fayde Hindi Mai

HASYA yoga - Laughter Yoga in hindi

Tanav aur depression ko dur kare:
Laughter yoga therapy karne se vyakti tanav aur depression jaisi bimariyo se dur rehta hai, aur aaj ke samay mai toh logo ke liye laughter yoga ek vardan ke saman hai. Kyuki aaj ke samay mai har vyakti tanav se pidit hai aur tanav hi anya kayi bimariyo ki jad hai. Jab aap laughter yoga ko karte hai toh isse mastishk ki koshikao mai endorphin namak rasayan mukt hota hai, jo ki aapke mood ko badalne aur tanav ko kam karne mai madadgar sabit hota hai.

Sar dard aur migraine ko dur karne mai sahayak:
Sharir ki jyada thakan aur tanav ke kaaran hi aapko sar mai dard paida hota hai aur sath hi migraine bhi sar se sambandhit ek bimari hai. Iss tarah laughter yoga hamare mastishk ke liye acha hota hai aur ye hamare mastishk se judi har samasya ke liye faydemand hota hai. Toh agar aap bhi sar dard aur migraine se pareshan hai toh laughter yoga ko apni dincharya mai shamil kare.

Immunity badaye:
Iss yoga ko rozana karne se aapke sharir ki rog pratirodhak kshamta badti hai aur isse aap jaldi bimar nahi padte hai. Iss yoga ko jo bhi vyakti niyamit rup se karta hai wo jaldi bimar nahi padta hai.

Uccha raktchaap ko dur kare:
Jin logo ko ucha raktchap ki bimari hoti hai, unn logo ke liye laughter yoga behad faydemand hota hai. Darasal uccha raktchap ki bimari unn logo ko hi hoti hai jo jyada tanav lete hai aur dimaghi tour par pareshan rehte hai. Agar aap laughter yoga karte hai toh isse aapka dimag aur mann shant rehta hai aur aap uccha raktchap jaisi bimariyo se dur rehte hai.

Dil se sambandhit bimariyo mai faydemand:
Agar aapko dil se sambandhit bimari hai ya phir aap chahte hai ki future mai aapko dil se sambandhit koi rog na ho toh aap rozana laughter yoga therapy ko kariye. Ye dil se judi problems ko cure karta hai aur bhavishya mai bhi inn bimariyo ke khatre se bachata hai.

Cancer se bachav:
Laughter yoga ko karne se cancer se bhi bachav milta hai. Darasal jab iss yoga therapy ko kiya jata hai toh isse hamare pure sharir ki andar se kasrat ho jati hai, jisse hamare blood ka circulation sahi tarike se hota hai. Iss tarah agar aap cancer se bachav chahte hai toh rojana iss yog therapy ka abhyas karen.

Asthma mai madadgar:
Laughter yoga therapy asthma ke marijo ke liye bhi behad faydemand mana jata hai. Jab iss yoga ko kiya jata hai toh isse aapke gale se lekar pet tak ki acchi kasrat ho jati hai, jisse cough banne ki pareshani ko kam kiya ja sakta hai.

Sakaratmak soch ka vikas:
Laughter yoga therapy ka sabse bada fayda ye hai ki ye hamare dimag mai sakaratmak soch ka vikas karti hai. Jisse hum kisi bhi nakaratmak soch ko sakaratmak mai badal sakte hai sath hi kisi bhi pareshani ka samna karne mein ghabrate nahi hai.

Anya fayde inhe bhi jane

  • Madhumeh ki bimari wale logo ke liye laughter yoga kafi faydemand sabit ho sakta hai.
  • Arthritis ki pareshani mai bhi laughter yoga therapy se fayda mil sakta hai.
  • Mahilao ke masik dharm se sambandhit pareshaniyo ko dur karne mai bhi laughter yoga therapy kafi faydemand sabit ho sakti hai.
  • Allergy ko dur karne mai bhi ye sahayak sabit hota hai.

Iss tarah upar apne jana laughter yoga therapy ke bare mai. Toh agar aap bhi apne dimag ko swasth aur tanav mukt rakhna chahte hai toh aaj se hi laughter yoga karna shuru kare.

Height Badhane ke Tarike – Vyayam aur Yoga Hai Madatgar

height badhane ke tarike - height growth tips in hindi (1)

Aksar dekha jata hai ki jin logo ki lambayi kam hoti hai unn logo mai confidence ki kami hoti hai, wohi agar vyakti ki height acchi ho toh wo kisi ke bhi samne khade hone mai hichkichata nahi hai. Iss tarah hamari lambayi hamare vyaktitva ko nikharne mai aham bhumika nibhati hai. Har vyakti chahta hai ki uski height lambi ho aur wo iske liye kayi tarah ke prayas bhi karta hai. Lekin kayi baar aisa hota hai ki unke dwara kiye gaye prayaso ka koi matlab nahi nikalta hai.

Sath hi market mai aise kayi product hai jo ki aapki height ko badane ka daawa karte hai, lekin unn mai kitni sacchayi hai uske bare mai koi nahi bata sakta hai. Iske alawa market mai bikne wale height badane wale products ka istemal karne se kayi baar aapko iske side effects bhi pahuch sakte hai.

Waise agar dekha jaye toh height kam hone ke kayi kaaran ho sakte hai, kayi logo par genetically iska effect padta hai. Jaise agar parivar mai mata ya pita mai se kisi ki height kam hoti hai toh unke baccho ki bhi height kam ho sakti hai. Lekin agar aap apni height badana chahte hai toh iske liye aap kuch yog aur vyayam ka sahara bhi le sakte hai. Aaj ham aapko apne iss lekh mai kuch aise yog aur vyayam ke bare mai batane ja rahe hai, jisse aap apni height bada sakte hai aur inn vyayaam ko karne se aapki health par koi bura side effect nahi hoga.

Height Badhane ke Tarike – Height Growth Tips in Hindi

Toh aaiye jante hai Height badane mai madadgar ye vyayam aur yogasana ke bare mai, jisse aap prakritik rup se apni height bada sakte hai aur sath hi isse aapko koi bura side effect bhi nahi hoga.

Tadasana ke dwara:

Tadasana karne se hamara sharir majbut banta hai, isliye ise tadasana aur english mai palm tree pose kaha jata hai. Yeh aasana height badane ke liye sabse best mana jata hai. Ise karne ke liye sabse pehle samtal jamin par ek dam seedhe khade ho jaye aur dono pairo ko apas mai mila le aur sath hi hatho ko baju mai rakhe. Ab apne dono hatho ko side se hi upar uthate huye saans bhare aur hatho ko upar le jakar milaye. Iske baad apne dono hatho ko mila kar, upar ki taraf stretch kare aur iske sath apni aidiyo (Ankels) ko upar ki taraf le jaye. Iss awastha mai aapka sharir ekdam sidha hona chahiye aur pure sharir ka wajan panjo par hona chahiye. Wapas apni purani awastha mai aate huye saans ko bahar chor de. Kuch der rukne ke baad iss prakriya ko apni kshamta ke anusar 10-15 baar kare. Iss yogasana ke abhyas se aapko apne sharir ki height badane mai madad milegi.

Bhujangasana ke dwara:

Bhujangasana ek aisa aasana hai jo ki bhujao ke bal par kiya jata hai aur ise English mai cobra pose bhi kaha jata hai. Isko karne ke liye jamin par pet ke bal let jaye aur apne pairo ke panjo aur aidiyo ko ek sath satakar rakhe, ab apni daadi (Chin) ko jamin se lagaye aur hatho ko kohni se mod kar hatheliyo ko apni bhujao ke pass rakhe. Ab apni naak ko jamin se sparsh karate huye fefdo me saans bhar le aur apne sar ko upar ki taraf uthaye aur apni chaati ko aage ki taraf is tarah le jaye ki aapki naabhi jamin par hi ho. Kuch 15 se 20 second is awastha me rehne ke baad dhire-dhire saans chorte huye apni purani awastha me aa jaye. Iss pranayam ko karne se aapko height badane mai madad milegi.

Shirsasana:

Shirsasana karne me thoda kathin hai, kyuki jab ham isko karte hai toh hame apne sar ke bal khade hona padta hai. Thyroid granthi ko thik karne me ise sabse achcha yogasana mana ja sakta hai. Isko karne se metabolism function santulit rehta hai aur hamara sharir tazgi se bhara rehta hai. Iske alawa ye anya kayi rogo ko thik karne me hamari madad kar sakta hai. Ye yogasana karne se aapke sharir ki height badne mai madad milti hai. Iss tarah agar aap apne sharir ki height badana chahte hai toh iss yogasana ko apni dincharya mai shamil kare.

Pashchimottasana:

Ye aasana bhi aapke sharir ki height badane mai madadgar sabit ho sakta hai. Iske alawa is aasana ko karne se pet se sambandhit sabhi pareshaniyo ko dur karne me madad milti hai.
Iss aasana ko karne ke liye jamin par sidha baith jaye aur apne pairo ko samne ki taraf faila le. Ab saans lete huye apne dono hatho ko upar ki taraf le jaye, is awastha me kamar ko ek dam sidha rakhe. Ab iske baad saans chorte huye, aage ki taraf is tarah se jhuke ki aap apne hatho se pairo ke anguthe ko pakde aur aapka sar aapke ghutno se touch ho. Ab saans ko samanya rakhte huye kuch samay ke liye isi awastha me rahe aur dobara se isi prakriya ko dohraye.

Basket ball khele:

Basket ball ek aisa game hai jo aapki height badane mai madad kar sakta hai. Ji haan basket baal khelne se aapki haddiyo par dabav padta hai, jisse haddiya khichti hai aur aapki height badne mai madad milti hai. Iss tarah agar aap bhi apni height badana chahte hai toh basket ball khel sakte hai.

Iss tarah upar aapne jana kuch height badhane ke tarike jismai yogasana aur vyayaam ke bare mai jiske abhyas se aap apni height bada sakte hai. Lekin inn mai se kisi bhi yogasana ko karne se pehle ise karne ki process ko puri tarah se jan le aur kisi yoga teacher se isko acchi tarah se sikhne ke baad hi aap akele mai inka abhyas kare. Kyuki ise galat tarike se karne se aapko nuksan ho sakta hai. Iss tarah agar aap bhi apne sharir ki height badana chahte hai toh inn yogasana aur vyayaam ko apni dincharya mai shamil kare.

[td_block_video_youtube playlist_title=”Health Tips in Hindi – Hindi Language Video” playlist_yt=”-n6D-j4ncgs, B7GuXE4yDbw, LRwIY-2eByY, uKqZHqJJcow, qfOL1dJu1bM, BsJFk5dsy7g, dEbTU3HjKwk, IuaX1HBGkFg, zSJioBb03rk” playlist_auto_play=”0″]

Dant Ka Dard (Teeth Problem in Hindi) – Dant Dard Ka Ilaj

Dant Ka Dard Dant Dard Ka Ilaj

Jab danton ki baat aati hai toh ham keh sakte hain ki dant hamare shareer ka aham hissa hain. Kyuki danton ke bina aap sahi dhang se khana nahi kha sakte hain aur na hi kisi bhi tarah ki koi cheez chaba sakte hain. Is tarah agar aapke daanton me dard ho toh aapko is tarah ki pareshani ka saamna karna pad sakta hai.
Kyuki yadi daanton me dard rahe toh aap khane peene se dur ho jate hain. Kya aap jante hain ki hamare daanton ka seedha sambandh hamare sar se hota hai aur agar aapko daantoh me dard ki shikayat hogi toh ye hamare sar ke dard ko bhi bada sakta hai.

Kayi baar dekha jata hai ki jab bhi aapke danton me dard hota hai toh iske kaaran aapke sar me bhi dard hone lagta hai kyuki hamare daanton ka sambandh hamare sar se hota hai, jiske kaaran jab bhi hamare daanton me dard hota hai toh isse hamare sar me bhi dard hone lagta hai.

Iske alawa chehre ki sundarta bhi hamare daanton par hi depend karti hai sath hi bina daanton ke hamara jeevan bhi mushkil ho jata hai, Kyuki kayi baar dekha jata hai ki jin logon ke daant samay se pehle hi nikal jate hain wo log nakli daant lagwa lete hain, kyuki bina danton ke jeevan sambhav nahi hai. Toh is prakaar ham keh sakte hain ki hamare daant hamare liye bahut hi jyada mahatva purna hain aur yadi hamare daanton me dard hai toh ham kuch gharelu upaay dwara is dard ko thik kar sakte hain.

Iske alawa kayi baar dekha jata hai ki ham apne daanton ki sahi dekhbhal nahi karte jiska parinaam ye hota hai ki hame daanton me dard ki shikayat ho jati hai, isliye apne danton ki sahi dhang se safayi rakhna bhi bahut jyada jaruri hai. Toh apne daantoh ki safayi aap ghar par hi rehkar sahi dhang se kar sakte hai.

Jab aapko lage ki aapko danton me dard ho raha hai toh aap turant hi doctor se salaah le aur doctor ki salaah se sahi tooth paste ka chunav karke uska istemaal karna shuru Karen aur sath hi meetha khana kam kar de kyuki meetha jyada khane se bhi aapke daanton ka dard bad sakta hai.
Iske alawa kayi aur gharelu upchar hai jisse aap apne daanton ka dard thik kar sakte hain, Toh aaiye aaj ham aapko is article me danton ke dard ke nivaran ke liye kuch gharelu upaay batane ja rahe hain, jisse aap apne dant ka dard gharelu upaay dwara thik kar sakte hain.

Dant Ka Dard – 7 Tips Dard Dard Ko Khatam Karne Ke Liye

Dant Ka Dard Dant Dard Ka Ilaj

1) Laung: Laung ek aisa prakritik utpaad hai jo hamare daanton ke liye bahut hi jyada laabhdayak hai. Isme kayi aise gun hote hain jo hamare danton ke bacteria aur germs ko khatam karte hai aur unhe majbooti pradaan karte hain sath hi isse aapke dant ka dard bhi band ho jata hai. Iske liye aap laung ko us daant ke pass rakhe jis daant me aapko dard ho raha hai, isse aapka dard jarur hi thik ho jayega. ISke liye aapko is prakriya ko niyamit rup se karna padega kyuki is prikriya se daant ka dard toh chala jayega kintu isme thoda time lag sakta hai.

2) Namak: Namak bhi aapke daanton ke dard ko kam karne me bahut hi jyada madad karta hai, iske liye aap gungune pani me namak daalkar garare kar sakte hain. Isse bhi aapke danton ka dard thik ho sakta hai aur aapke daanton ke dard me rahat milegi.

3) Hing: Hing daanton ke dard ke liye bahut hi jyada laabhdayak hai, Is tarah agar daanton ke dard ko thik karne ki jab bhi baat hoti hai toh hing ka naam sabse pehle aata hai, Kyuki hing daanto ke dard ko thik karne ke liye ek aisa prakritik utpaad hai, jisse danton ka dard jaldi hi thik ho jata hai. Iske liye aap thodi si hing ko mosambi ke ras me milaye aur cotton me is misran ko lekar dard hone wale daant par rakh le, isse aapke dant ka dard jaldi hi thik ho jayega.

4) Pyaaj (Onion): Pyaaj bhi ek aisa khadya utpaad hai jo danton ke dard ko dur bhagata hai. Iske liye aap kachche pyaj ko chabaye, aisa karne se aapko daanto ke dard me araam milega. Waise bhi jo log rozana bhojan ke sath kachche pyaj ka sevan karte hain, unko danton ke dard ki shikayat bahut hi kam rehti hai, isliye kachche pyaj ka sevan bhojan ke sath jarur karna chahiye.

5) Lehsun (Garlic): Lehsun bhi ek aisa khadya utpaad hai jo apke danton ke dard ko dur kar sakta hai. Isme kayi anti-biotic gun hote hain jo muh ke germs aur bacteria se ladne me hamari madad karte hain. ISke liye aap lehsun ki do kali le aur ise kachcha hi chabaye, isse aapke daant ka dard thik ho jayega.

6) Haldi: Haldi ek aisa utpaad hai jo kisi bhi tarah ke dard ko dur karne ke liye upyog me layi jati hai. Is tarah agar daanton ke dard ko dur karna hai, tab bhi ham haldi ka upyog kar sakte hain. Iske liye thodi si haldi le aur isme thoda sa sarso ka tel mila le aur is mishran se apne daanton par ungli ki sahayata se manjan Karen. Isse aapko jarur hi daant ke dard me araam milega. Iske alawa aap haldi me thodi si bhuni huyi phitkari ko milakar mishran bana le aur isse bhi aap ungli ki sahayata se manjan kar sakte hain. Isse bhi aapke daant ka dard thik ho jayega.

7) Protein aur Calcium: Daanton ko majbuti pradaan karne ke liye calcium aur protein bahut jaruri hota hai. Is tarah hame daanton ki majbuti aur swasth daanton ke liye protein aur calcium yukt bhojan karna chahiye. Isse aapke danton ko majbuti bhi milegi sath hi aapke daant bhi swasth rahenge, kyuki daanton ke liye calcium bahut hi jyada mahatvapurna hota hai aur danton ki banabat calcium par hi aadharit hoti hai.

Is tarah upar hamne aapko dant ke dard ke liye kuch gharelu upaay bataye, jinse aapke danton ka dard thik ho sakta hai. Agar in upaayon ko karne par bhi aapke daanton ka dard thik nahi hota hai toh doctor ki salaah jarur le aur daanton ko swasth rakhe.

Yoga For Face Glow Tips in Hindi – 15 Tips by Baba Ramdev

Yog guru Baba Ramdev ke bare mai toh sab log jante hai, unke dwara bataye gaye tariko ko apna kar ham har tarah ki sharirik aur mansik pareshani se chutkara pa sakte hai. Aaj yaha ham baba ramdev ke dwara bataye gaye kuch aise nuskho ke bare mai janege, jinse aap apne chehre ko nikhar sakte hai aur apni sundarta par char chand laga sakte hai.
Baba ramdev har tarah ki bimari se chutkara dilane ke liye prakritik cheezo ke upyog par hi jor dete hai aur jaha sundarta ko badane ki baat aati hai toh uske liye bhi unhone kayi pranayam aur gharelu cheezo ke bare mai bataya hai.

Baba ramdev ke dwara bataye gaye gharelu upchar aur yog aise hai, jinke upyog se aap jaldi hi apne pareshani se chutkara pa sakte hai. Toh agar aap bhi apne chehre ko sundar aur gora banana chahte hai toh unke dwara bataye gaye gharelu upaayo ka upyog kare aur sath hi aap pranayam aur yog ka bhi sahara le sakte hai. Toh aaiye jante hai baba ramdev ke dwara bataye gaye gharelu upchar ke bare mai.

15 Beauty Tips in Hindi – Yoga for Face Glow in Hindi
face glow tip

1) Pranayam kare: Agar aap apne chehre ki sundarta aur chamak ko hamesha ke liye banaye rakhna chahte hai toh baba ji ke dwara bataye gaye kapalbhati aur anulom-vilom pranayam ko apni dincharya mai shamil kare. Isko karne se aapke lungs mai oxygen jyada matra mai andar jati hai aur carbon-di-oxide bahar nikal jati hai. Kapalbhati aur anulom-vilom pranayam ko niyamit rup se karne se 4 se 5 mahine mai hi aapke chehre mai chamak aa jayegi aur sath hi ye aapki skin ko permanently chamak aur sundarta deta hai. Iss tarah ye upaay aapko prakritik rup se sundar aur jawan banaye rakhta hai.

2) Nimbu ka kare prayog: Baba Ramdev ke anusar nimbu ka prayog din mai ek baar apne chehre par jarur karna chahiye, kyuki ye hamare chehre ki prakritik rup se cleansing aur bleaching karta hai. Iss tarah nimbu ke prayog dwara chehre ke har tarah ke daag-dhabbe, sun tanning aur muhaso ko Prakritik rup se jad se khatam kiya ja sakta hai. Iske liye aap din mai ek baar nimbu ko face par ragad lijiye aur kuch samay baad ise halke gungune pani se wash kar lijiye.

3) Kachcha dudh: Kachche dudh ko chehre par lagane se chehre par natural glow aata hai aur sath hi hamare chehre ka rang bhi saaf hota hai. Babaji ke anusar roj raat ko sone se pehle apne chehre par kachcha dudh laga kar soye aur subah uth kar apne chehre ko saaf pani se dho le. Iss tarah babaji ka ye upaay aapke chehre ko natural glow dega.

4) Banana mask: Babaji ke anusar banana mask aapke chehre ko chamak pradaan karta hai. Iske liye aap banana ko mash kar le aur ab isme shehad aur nimbu ki kuch bunde mila le. Ab inn sab ko achchi tarah se mila kar apne chehre aur gardan par laga le aur lagbhag 15 se 20 minute baad apne chehre ko wash kar le. Iss prayog ko hafte mai ek baar jarur karna chahiye.

5) Besan face mask: Baba ramdev chehre par hamesha ayurvedik aur gharelu cheezo ko hi lagane par jor dete hai. Besan chehre ke liye bahut achcha maana jata hai aur iska face mask chehre ki gandgi ko saaf karne mai bhi madad karta hai. Iske liye aap simple besan ko gulab jal ke sath mila kar apne chehre par lagaye aur kuch samay rakhne ke baad ise saaf kar le. Iss prayog ko hafte mai 2 baar kare. Iske alawa aap rojana besan se apne chehre ko dho bhi sakte hai.

6) Aloe vera ka prayog: Aloe vera ka prayog hamari twacha ko kisi bhi tarah ke infection se bachane mai madad karta hai. Babaji batate hai ki din mai aur raat ke samay aloe vera gel ko apne chehre, gardan aur hatho par laga kar massage kare, isse aapki twacha mai extra shine aayegi aur sath hi isse aapki twacha bhi swasth rahegi.

7) Chehre ko ragde: Babaji ke anusar nahate samay apne chehre ko mulayam towel se ya phir cotton ke kapde se halke hatho se ragad le, isse aapke chehre ki dead skin nikal jayegi aur sath hi isse aapke chehre ki twacha komal aur tight banegi.

8) Khoob pani piye: Pani khoob pina chahiye, isse aapke andar ke toxins bahar nikal jate hai, jisse aapke chehre mai andar se glow aata hai. Babaji kehte hai ki din mai kam se kam 3 se 4 liter pani pina chahiye, isse aapki twacha swasth rahegi aur sath hi aapka swasth bhi thik rahega.

9) Fresh fruit juice piye: Baba ramdev ka kehna hai ki market mai uplabdh pey (Drinks) ko chor kar fresh fruit juice pina chahiye. Kyuki market mai uplabhdh pey, cold drinks aadi aapke sharir ko nuksaan hi pahuchati hai aur wohi fresh fruit juice aapke swasth ke liye toh achche hote hi hai sath hi isse aapki twacha hamesha jawan bani rehti hai.

10) Tamatar (Tomato) ka upyog kare: Tamatar baba ramdev ki beaty tips mai bahut jyada mahatvapurna hai. Tamatar ke rojana sevan se hamara sharir free redicals se bach jata hai aur sath hi iska sevan karne se hamari twacha toh jawan bani hi rehti hai aur sath hi hamara budapa nahi aata hai. Ye hamare sharir ke wajan ko bhi niyantrit karne mai aham bhumika nibahata hai. Iske alawa aap chahe toh ise face pack mai mila kar apne chehre par apply kar sakte hai.

11) Anar (Pomegranate) ka sevan: Anar ka sevan aapki twacha ke liye bahut labhdayak sabit ho sakta hai. Anar mai paya jane wala antioxidant gun aapki twacha ke kharoch aur kisi bhi tarah ki chot ko jaldi bharne mai madad karta hai. Iske alawa agar aap iske juice ka sevan karte hai ya phir anar ke fal ko khate hai toh isse na sirf aapke khoon mai badotri hoti hai balki ye aapke khoon ko saaf bhi karta hai. Yahi kaaran hai ki iske sevan dwara aapki twacha gulabi aur sundar banti hai. Iske alawa iska anti-aging gun aapki twacha ke wrinkles ko kam karne ka kaam karta hai.

12) Akhrot ka sevan kare: Akhrot hamari twacha ke liye bahut faydemand hota hai, iss mai fatty acid aur omega 3 paya jata hai jo hamari twacha ko nami pradan karta hai. Iss tarah iska sevan aapki twacha ko poshan dene mai madad karta hai. Iske alawa twacha mai chamak banaye rakhne ke liye ham akhrot ke oil se apne sharir ki massage bhi kar sakte hai, isse aapki twacha bhi jawan bani rehti hai.

13) Daal (Pulses) ka sevan kare: Dalo ka sevan hamare sharir ke liye bahut labhdayak hota hai, iske alawa ye hamari twacha ke liye bahut faydemand sabit ho sakti hai. Daal mai paya jane wala protein hamari twacha ki koshikao ke niramaan mai sahayak hota hai aur sath hi ye hamari twacha mai chamak bhi lata hai. Iske sevan ke alawa aap chahe toh daalo mai se masoor ki daal ka face mask bana kar apne chehre par laga sakte hai. Ye ek achche scrub ka kaam karti hai.

14) Sahi neend le: Baba Ramdev ke anusar har vyakti ko raat mai jaldi sona chahiye aur subah jaldi uth kar yog karna chahiye, aisa karne se aapke chehre par lalima aati hai. Iske alawa 7 se 8 ghante ki neend jarur lena chahiye. Babaji kehte hai ki aapko raat mai 10-11 baje se jyada late nahi sona chahiye, kyuki agar ham late sote hai toh isse aankho ke niche kale ghere ho jate hai jo ki hamare chehre ko bahut hi ganda kar dete hai.

15) Khush rahe: Jab aap khush rehte hai toh aapka chehra apne aap hi blush karta hai, iska sabse pramukh kaaran ye hai ki jab aap khush rehte hai toh aapke sharir mai kuch aise hormones ka niraman hota hai jo aapki twacha ko sundar banane mai madad karte hai aur aapki twacha mai chamak late hai. Iss tarah aapke khush rehne se aur aapke vicharo ko achcha rakhne se aapke chehre ki twacha par achcha effect padta hai.

Aaj yaha aapne Baba Ramdev ke dwara bataye gaye kuch aise tips ke bare mai jana jo aapke chehre ko prakritik rup se sundarta pradaan karege aur sath hi aapke swasth ko bhi thik rakhege. Toh agar aap bhi apni twacha mai lalima lana chahte hai toh baba ji ke dwara bataye gaye tips ka prayog kare aur swasth aur sundar twacha paye.

[td_block_video_youtube playlist_title=”” playlist_yt=”FIbIR-wu2Gc, vusACK50lPw, QWCsf7NtesM” playlist_auto_play=”1″]

Yoga for Kids – 9 Yoga Poses and Benefits for Children

YOGA FOR KIDS IN HINDI

Waise toh yogasana karne ka hamare jivan mai bahut mahatva hai, inn yogasano ke abhyas se na sirf hamara sharir ka balki hamare dimag ka bhi sampurna vikas hota hai, yahi kaaran hai ki yog hamare sharir ka smampurna vikas karne mai madadgar hota hai.
Agar ye bade logo ke liye faydemand ho sakta hai toh agar ise bachpan se hi baccho ki dincharya mai shamil kar diya jaye toh wo bachpan se hi sharir se swasth aur dimag se purna viksit hoge. Toh aaj yaha ham kuch aise pranayam aur yoga for kids ke bare mai baat karege, jinko karne se baccho ke sharir aur dimag ka purna vikas hoga.

Yoga karne se baccho ke dimag ka sahi tarike se vikas hota hai. Kayi tarah ke kiye gaye shodho se pata chala hai ki yogasana ko karne wale baccho ke sharir aur dimag ka vikas anya baccho ki tulna mai sahi tarike se hota hai. Iske sath hi yagasana ko karne se concentration badta hai sath hi memory bhi sharp hoti hai. Isliye baccho ko bachpan se hi yogasan ko karwana chahiye.

Agar yogasana ke karne ki age ki baat kare toh kam se kam 3 saal se baccho ko pranayam aur yogasan ka abhyas karaya ja sakta hai. Iske alawa 5- 12 saal ke bacche har tarah ke yog abhyas ko kar sakte hai. Lekin yog abhyas ko karne se pehle aap yogasan ke bare mai puri tarah se jankari le, uske bad hi uss yogasana ko kare, kyuki galat tarike se yog abhyas karne se bacche ko iska nuksan bhi ho sakta hai.

Isliye kisi acche yoga teacher se bacche ko abhyas ka parikshan dilaye, uske baad hi bacche ko yog abhyas karaye. Toh aaiye jante hai baccho ke liye kuch mahatvapurna parnayam aur yog abhyas ke bare mai.

Yoga For Kids in Hindi – 8 Important Aasan Bacho Ke Liye

YOGA FOR KIDS IN HINDI

1) Bhastika pranayam: Ye pranayam baccho ke liye bahut hi jyada labhkari hota hai aur sath hi karne mai bhi bahut asaan hota hai. Isko karne se mann shaant rehta hai. Isko karne ke liye jamin par chatayi bicha kar baith jaye aur aankh band karke lambi-lambi saans andar lena hai aur bahar chorna hai. Iss prakriya ko karne se baccho ke sharir ke andar urja aati hai. Kam se kam ek minute roj ise baccho ko karwana chahiye.

2) Kapalbhati pranayam: Kapalbhati pranayam toh apne naam se hi jana jata hai. Iss pranayam ko rojana kam se kam 5 minute karna chahiye, bacche chahe toh ise beech mai ruk ruk kar kar sakte hai. Iss pranayam ko karne se bacche balshali bante hai, unka sharir ubhra hua rehta hai. Iske alawa iss pranayam se memory sharp hoti hai, dimag tez doudta hai aur sath hi ekagrata mai bhi vridhdhi hoti hai. Yog Baba Ramdev iss pranayam ko karne par jor dete hai, kyuki na sirf baccho ke liye balki har umar varg (Age group) ke liye ye pranayam faydemand hota hai. Ye pranayam har marj ki dawa hai, isse kayi tarah ki bimariyo jaise pet dard, sar dard, heart ki problem, kidney ki problem, iske alawa bhi kayi tarah ki pareshaniya dur hoti hai. Lekin iss pranayam ko sahi tarike se karna bhi bahut jaruri hai.

3) Anulom-vilom pranayam: Anulom-vilom pranayam bhi kapalbhati pranayam ki tarah hi bahut faydemand hota hai. Iss pranayam ko karne se bhi har tarah ki pareshaniyo se mukti payi jati hai, ye baccho ko bachpan se hi kayi bimariyo se dur rakhte huye swasth aur balshali rakhta hai. Iss pranayam ko karne se bhi dimag tez hota hai aur ekagrata mai vridhdhi hoti hai, aur dil se sambandhit kayi bimariya dur hoti hai. Ise rojana 5 se 10 minute karna chahiye, isse anidra aur kaan (Ears) se sambandhit pareshaniya bhi dur hoti hai.

4) Dhanurasana: Iss aasana ko karne se bacche mai confidence ki vridhdhi hoti hai, iske alawa bacche ke dimag ka vikas hota hai aur sath hi kisi bhi cheez ke prati focus bhi accha hota hai. Iss tarah ye aasana baccho ke sahi vikas mai labhdayak hota hai.

5) Vrikshasana (Tree posture): Iss aasana ko karne se baccho mai balance ko build kiya jata hai. Iske alawa iss aasana ko jab ham karte hai toh hame apne sharir ko balance karna hota hai aur alert bhi rehna hota hai, jiske kaaran baccho mai balance build hota hai aur sath hi alertness aata hai. Iske alawa baccho ke brain ke vikas ke liye ye aasana mahatvapurna hota hai.

6) Tadasana: Ye aasana baccho ki lambayi badane mai bahut madadgar hota hai, iss tarah iss aasana ko karne se baccho ki height ko badaya ja sakta hai aur sath hi hath aur pairo ki puri tarah se growth karne mai madadgar hota hai. Jin baccho ki height bachpan mai kam hoti hai, unn baccho ko iss aasana ko karna chahiye.

7) Bhujangasana: Iss aasana ko karne se baccho ko pet aur digestion se sambandhit koi bhi pareshani nahi hoti hai. Ye aasana baccho ke proper digestion mai madadgar hota hai. Iss aasana ko karte samay baccho ki back stretch hoti hai jo ki sharir ki growth aur digestion ke liye labhdayak hota hai.

8) Ardh sarvangasana: Iss yoga ka abhyas karne se baccho ka sharir mai lachak aur flexibility aati hai, jisse ki baccho ka sharir har tarah ki activity karne ke liye taiyar rehta hai. Ardh sarvangasana baccho ke pure sharir ke vikas mai madad karta hai aur sath hi baccho ka aalas kam hota hai aur bacche active bante hai.

9) Savasana: Iss aasana ko sare aasana karne ke baad sabse last mai kiya jata hai. Iss aasana ko karne se bacche relax ho jate hai. Iske sath hi ye aasana sharir ko shant kar deta hai jisse sharir ki thakan aur tanav dur ho jata hai. Ye sharir aur mann dono ko shant karne mai madad karta hai. Iss aasana ko karne ke liye jamin par dari bichakar sidhe let jaye aur apna dhyan apni saanso par kendrit kar le.

Upar aapne jana ki baccho ko kaun-kaun se pranayam aur aasana karna chahiye, jisse unka sharir aur dimag sahi tarike se viksit ho sake. Waise toh aaj ke samay mai har vyakti ko yog abhyas karna chahiye, lekin agar bacche bachpan se hi yog abhyas karna shuru kar de toh isse unhe future mai kisi bhi tarah ki sharirik pareshani nahi hogi.

Iss tarah har ghar ke bacche yog karege toh har ghar ke bacche sharir aur dimag se viksit hoge. Isliye agar aap bhi apna aur apne baccho ka sahi vikas chahte hai toh aaj se hi apni dincharya mai yog ko shamil kare aur apne baccho ko bhi iska abhyas karaye.