Long Hair Tips in Hindi – Gharelu Nukshe Lambe Baalo Ke Liye

Hair Care Tips in Hindi - Tips for Long and Silky Hair in One Month in Hindi

Long Hair Tips in Hindi: Lambe baal har mahila ki chahat hoti hai, lekin har mahila ka ye sapna pura nahi ho pata hai. Lambe baalo ki chahat hote huye bhi kayi baar baal kam hone ke kaaran baalo ko chota rakhna padta hai.

Kayi baar lambe baalo ki chahat me mahilaye kayi tarah ke upaay apnati hai, kayi tarah ke cosmetics ka prayog karti hai, lekin kayi baar itne upaay aur itne paise kharch karne par bhi unhe uska koi result nahi mil pata hai.

Lekin lambe baalo ke liye acche aur mehenge utpaad jaruri nahi hai, balki baalo ki sahi dekh bhal aur sahi ahaar ki jarurat hoti hai. Kayi baar ham apne khan pan par dhyan nahi dete hai jisse hamare sharir me andar se kamjori aa jati hai aur jiska seedha asar hamare baalo aur twacha par padta hai, jisse hamare baalo ki sahi growth nahi ho pati hai. Isliye jaruri hai ki ham apne baalo ki sahi dekh bhal kare aur unki acchi growth aur lambayi badane ke liye sahi ahaar le.

Aaj ham apne iss article me aapko kuch aise tips batane ja rahe hai jisse aap apne baalo ki lambayi bada sakti hai. Toh aaiye jante hai ki kis tarah se aap gharelu prayogo dwara apne baalo ki lambayi ko bada sakte hai.

Long hair Tips in Hindi – Silky, Lambe aur Hair Growth Ke Home Remedies

Gharelu upaay apnaye:

Agar aap apne baalo ko lambe banaye rakhna chahti hai toh iss baat ka jarur dhyan rakhe ki aap apne baalo par bahar ke cosmetics ka kam se kam prayog kare, kyuki market me uplabdh products aapke baalo ko nuksan  pahuchate hai.

Isliye jab bhi aap apne baalo ki dekh bhal ke liye kuch prayog me laye toh kosish kare ki wo gharelu hi ho.

Baalo ki safayi ka rakhe dhyan:

Baalo ko swasth aur lamba banaye rakhne ke liye ye jaruri hai ki aap apne baalo ki safayi ka dhyan rakhe. Kayi baar ham apne baalo ko samay-samay par dhote nahi hai jisse hamare baalo ki jado me gandgi jama ho jati hai aur iss gandgi ke kaaran baalo ki jado me infection aur rusi ki pareshani ho jati hai, jisse hamare baal kamjor ho jate hai aur unme kayi tarah ki pareshaniya paida ho jati hai.

Isliye apne baalo me ek hafte me kam se kam 2 baar oil jarur lagaye aur 2 baar apne baalo ko jarur wash kare.

Oil jarur lagaye:

Agar aap apne baalo ko sundar, lamba aur ghana banaye rakhna chahti hai toh samay-samay par apne baalo me oil lagate rahe, kyuki baalo ko poshan dene me oil bahut jyada aham hota hai. Isliye ye jaruri hai ki week me kam se kam 2 baar apne baalo me acchi tarah se oil laga kar massage kare.

Baalo me acchi tarah se oil massage karne se oil baalo ki jado tak pahuch jata hai, jisse baalo ko poshan milta hai.

Ye oil kare prayog:

Agar aap apne baalo ko lamba banaye rakhna chahte hai toh iske liye aap apne baalo me nariyal tel, badaam tel, jetun tel, sarso tel, shikakayi tel ya phir amla tel ka istemal kare.

Ye sabhi tarah ke oil baalo ke liye acche mane jate hai, isse balo ko poshan milega aur isse baalo ki lambayi badne me madad milegi.

Baalo ko jyada wash na kare:

Iss baat ka dhyan rakhe ki apne baalo ko roj wash na kare, kyuki baalo ko roj wash karne se baalo ki jado ka prakritik oil khatam ho jata hai, jisse baalo ki nami chali jati hai aur baal jhadne lagte hai.

Agar aap week me baalo ko 3-4 bar dhoti hai toh baal dhone ke kam se kam ek ghante pehle apne baalo me oil ya dahi jarur laga le.

Sahi ahar hai jaruri:

Baalo ki lambayi badane ke liye sahi ahaar bahut mahatvapurna hai. Agar aap sahi ahaar nahi lete hai toh bhi aapke baalo ki growth aur lambayi par asar padta hai.

Aksar aapne dekha hoga ki jab ham bimar padte hai toh hamare baal jhadne lagte hai kyuki uss samay ham sahi ahaar nahi le pate hai. Iss tarah hamare sharir ke liye sahi ahaar bahut jaruri hai.

Jyada color na kare:

Agar aap apne baalo ko swasth rakhna chahti hai toh apne lambe baalo ko jyada color na kare, kyuki color me kayi tarah ke aise bekar padarth hote hai jo hamare baalo ko nuksan pahucha sakte hai.

Sath hi agar aapke baalo me koi problem na hone par bhi problem shuru ho sakti hai.

Amla hai faydemand:

Baalo ko swasth banaye rakhne me amla bahut faydemand sabit hota hai. Amla me vitamin-C bharpur matra me paya jata hai, sath hi isme carytenoids, levons aur vilevonoids paye jate hai jo ki baalo ko badne me madad karte hai.

Iss tarah baalo ke liye amla ka sevan kafi faydemand hota hai. Iska sevan karne ke sath hi iska pack bana kar aap apne balo me lagaye.

Methi dana:

Agar aap apne baalo ko lamba banaye rakhna chahte hai toh methi dana aapke liye behad faydemand sabit ho sakta hai. Iske liye aap methi dana ko pani me bhigo le aur acchi tarah bheeg jane ke baad isko pees kar paste bana le, ab iss paste ko apne baalo me lagaye.

Isse aapke baalo ko lamba hone me madad milegi. Sath hi aapke baal ghane hoge aur safed bhi nahi hoge.

Iss tarah upar aapne jana ki baalo ko lamba banaye rakhne ke liye kya upaay kiye ja sakte hai. Toh agar aap bhi apne baalo ko lamba banaye rakhna chahte hai to upar bataye gaye upayo ko apnaye aur baalo ki lambayi ke sath unki sundarta ko bhi badaye.

Related Post